НА УТРЕНИ

На Бог Господь: тропарь святой, дважды. Слава, и ныне: Гавриилу вещавшу:

По 1-м стихословии седален, глас 1:

К тебе, Богоблаженная царице, прибегаем, / преклоньше колена пред святым гробом твоим, / и просим оставления грехов наших испросити / у Всещедраго Господа нашего, / подающаго всем кающимся / велию и богатую милость.

Слава, и ныне, глас тойже:

Пречистая Богородице, / яже на Небесех Благословенная, / и на земли славословимая: / радуйся, Невесто Неневестная.

По 2-м стихословии седален, глас 3:

Заповеди Господни возлюбивши, / от юности твоея, Феофание блаженная, / многим была еси наставница христианскаго жития, / и супружества доброе правило, / многия ко Христу привела еси; / темже днесь празднующе всечестную память твою, / прославляем Бога, прославляющаго святыя Своя.

Слава, и ныне, глас тойже:

Прибежище и сило наша, Богородице, / крепкая Помощнице мира, / молитвами Твоими покрый рабы Твоя / от всякия нужды, / Едина Благословенная.

По полиелее седален, глас 8:

От юности твоея предъизбра тя Господь в селения Своя, / Богоблаженная  мати  Феофание, / и от Вседержительныя десницы Его / положися венец нетленен на главе твоей, / и, озарена бывши от Него Божественным светосиянием, / ныне молишися за град твой и вся христианы, / святую память твою верно почитающия / и Христу воспевающия: / слава Тебе, Господи, творящему дивная Твоя чудеса.

Слава, и ныне, глас тойже:

Под покров Твой Дево, вси прибегающе вопием Ти: / мольбу приими от нас, / и не престай молящися Человеколюбцу, / спастися рабом Твоим.

Таже степенна, 1-й антифон, глас 4. Прокимен, глас 4: Терпя, потерпех Господа, / и внят ми, и услыша молитву мою. Стих: И вложи во уста моя песнь нову, / пение Богу нашему. Всякое дыхание: Евангелие от Марка, зачало 21.

По 50-м псалме стихира самогласна, глас 6:

Словеса евангелькия запечатлевши в сердце твоем, / изволение твердое Богу усердно служити имела еси, / достоблаженная мати Феофание. / Темже ни царскаго жития широта, / ни скорби теснаго пути подвижническаго / отнюд не возмогоша от любве Божия отлучити тя, / но, добрыми подвиги подвизавшися на земли, / Небесную славу улучила еси, всечестная, / ныне же, предстояще престолу Вседержителя, / молися о чтущих любовию память твою.

Канон Богородицы со ирмосом на 6 и святыя на 8.

Канон святыя, глас 1-й, егоже краегранесие в тропарех (кроме Богородичных): Феофанию мудрую царицу поем.

Песнь 1

Ирмос: Твоя победительная десница / боголепно в крепости прославися: / та бо, Безсмертне, / яко всемогущая, / противныя сотре, / Израильтяном // путь глубины новосоделавшая.

Феофанию достойно воспоим, / Богомудрую царицу, / яко воистину Бога являющую / и Небеснаго Царствия причастницу, / в неже яко верная раба Христова вниде / и принесе славу свою яко венчанная царица. / Темже зовем ей: / радуйся, яко неувядаемый венец прияла еси.

Еже единое на потребу познавши, / красоту и славу мира сего презрела еси, / и духом непрестанно пламенеющи, / труды и подвиги возлюбила еси паче сладостей жития суетнаго, / и в терпении адамантовем до конца пребыла еси. / Темже зовем ти: / радуйся, яко неувядаемый венец прияла еси.

Оставления прегрешений нам испроси, / попечением твоим николиже нас оставляющи / и моления наша приемлющи, / да вси в радости духовней вопием: / радуйся, яко неувядаемый венец прияла еси.

Богородичен: Пажити страстей плотских ныне окружают мя, и оскорбляют люте: / посети скоро раба Твоего, Дево, и от озлобляющих мя спаси.

Песнь 3

Ирмос: Едине ведый человеческаго существа немощь / и милостивно в не воображся, / препояши мя с высоты силою, / еже вопити Тебе, Святый: / одушевленный храме // неизреченныя славы Твоея, Человеколюбче.

Фарисейскаго лицемерия бегающи, / мирския же славы отвращающися / и в тайне подвизающися, / единыя похвалы от Бога чаяла еси, / юже и стяжала еси, / и сподобилася еси Небеснаго Царствия.

Адамов грех высокоумия тебе, блаженная, не приразися, / смиренномудрием Христовым яко стеной ограждшейся, / ты бо рабство Христово возлюбила еси / паче владычества земнаго, / сего ради и сподобилася еси Небеснаго Царствия.

Никтоже веде, / яко достославная царица, / багряницею и виссом облеченная, / вретище власяно теми прикрывает / и мужественно язвы терпит, / страсти удобно побеждающи и Господеви зовущи: / не лиши мене Небеснаго Царствия.

Богородичен: Стенание, Чистая, и душевную слезу, / и присное ми умиление подаждь, Отроковице, / яко да плáчу одержащия мя страсти от невнятия, Богоблагодатная.

Седален, глас 7-й:

Возсия днесь всепразднственная память / блаженныя царицы Царяграда, / приидите людие, стецемся празднолюбцы, / тоя честным мощем поклонимся, / и тоя святый лик лобызающе возопиим: / о, премудрая Феофание, / блаженства райскаго неложная причастнице, / того сладости наследовати моли / к тебе усердно прибегающим // и чтущим твоя подвиги верно.

Слава, и ныне, Богородичен:

Предстательнице нератная, Богородительнице, / и молитвенице готовая притекающим к Тебе, / от бед мя избави: / да не презриши мене, всех Заступнице.

Песнь 4

Ирмос: Гору Тя благодатию Божиею приосененную / прозорливыма Аввакум усмотрив очима, / из Тебе изыти Израилеву провозглашаше Святому, // во спасение наше и обновление.

Иовлеву терпению поревновала еси, / озлобления и гонения приемлющи / и в темницу всаждаема, / в молитвах же непрестанно пребывающи, / сего ради стяжала еси Духа благодать / и светильник свой возжгла еси, // яко мудрая дева.

Юность и красоту, / богатство и владычество земное / всеконечно презрела еси, Феофание, / и в чертозех царских пребывающи, / в пустыню духом вселилася еси, / и на страже сердца твоего непрестанно бдящи пребыла еси, / яко да в Небесный Чертог // с мудрыми девами внидеши.

Милостыни елей на всяку язю изливающи, / сотворила еси в житии твоем блаженную куплю / и ко вратом Небесным приступила еси, / яже тебе радостию отверзошася, / и взошла еси в Чертоги Жениха // вкусити безсмертныя трапезы.

Богородичен: Очистилище всегда моему сердцу покажи, Пречистая, / святых воспоминание, и прегрешений очищение.

Песнь 5

Ирмос: Просветивый сиянием пришествия Твоего, Христе, / и освятивый Крестом Твоим мира концы, / сердца просвети светом Твоего Богоразумия, // православно поющих Тя.

Умныма очима непрестанно на Солнце Правды взирающи, / просветилася еси Того сиянием, / добродетелей лучами в житии твоем просиявши, / темже и нас просвети, // Светоподателя за ны умоляющи.

Державная венценосице, / умудри и просвети люди православныя, / яко да в праведности тебе последующе, / ризы же своя паче снега убеливше, / внидут в Горний Иерусалим, // идеже свет возсия невечерний.

Ризою жестокою / облекалася еси на земли, всеблаженная, / непрестанно молящися, / да подаст тебе Господь одежду светлу, / Одеяйся светом яко ризою, / и в Чертог украшенный введет тя, // из негоже вся извергнутся не имущии одеяния брачна.

Богородичен: Себе осуждаю прежде испытания, Богорадованная, / студная дела ношу един осужденный, / но предстани мне яко предстательница сущи всем, / и лютаго осуждения избави мя.

Песнь 6

Ирмос: Обыде нас последняя бездна, / несть избавляяй, вменихомся яко овцы заколения, / спаси люди Твоя, Боже наш: // Ты бо крепость немощствующих и исправление.

Угодила еси Богу, / и избегла еси погибельнаго рова, / и на Гору Господню взошла еси, / ум твой всегда горe воздвизающи, / сердце же долу во смирение преклоняющи, // и прешла еси житейскую пучину безбедно.

Юдоль плачевную жития земнаго / царским путем прешла еси, богомудрая, / и достигла еси Града Божия, / в немже ныне прославляешися. / Но призри с высоты на чтущия тя, / аще и во глубине падений пребывающия, // и избави ны от скверн и к Богу возведи ны.

Церкви корабля / никогдаже возмогут волны моря житейскаго потопити, / темже и вся яже на нем / безбедно брега онаго блаженнаго достизают / и потопления корабля веры не терпят. / Сие познавши, премудрая Феофание, / корабля церковнаго не оставляющи, // преплыла еси глубину несмущенно.

Богородичен: Освяти мой ум, и просвети сердце мое, Святая Мати Божия, / и одержащих мя зол измени: / да Тя славлю твердую Заступницу мою.

 

Кондак, глас 3-й:

Царским венцем на земли венчанная, / блаженная Феофание, / Небеснаго венца возжелала еси, / темже и плоть твою бдением же и пощением озлобляла еси, / багряницею царскою вретище власяно прикрывающи / и молитвы теплыя Богу приносящи на всяк час, / подвиги же твоя творя тайне. / Темже тя яве прослави Подвигоположник Христос Бог наш, / и ныне ти вси взываем: / радуйся, блаженная царице, // яко сподобилася еси Небеснаго Царствия.

Икос

Приидите, царие и вельможи, / царицу, преподобным в житии поревновашую, достойно почтим, / приидите, нищии и убозии, / милостивую в милосердии Отцу Небесному подражавшую прославим, / приидите, священницы и вси людие, / новую богоявленную нашу заступницу верно воспоим / и в молитву сию Богу приводяще, той возопиим: / радуйся, блаженная царице, // яко сподобилася еси Небеснаго Царствия.

Песнь 7

Ирмос: Тебе, умную, Богородице, пещь разсмотряем, вернии;/ якоже бо отроки спасе три, Превозносимый, / мир обнови во чреве Твоем всецел, // хвальный отцев Бог и препрославлен.

Анны честныя твоея матере безчадствовавшия, / якоже древле матере Самуиловы, / молитва слезная услышана бысть, / утеши бо ю дарованием чада, – / тебе, богоявленныя отроковицы, – // Хвальный отцев Бог и Препрославлен.

Рахили, Сарре и Ревекке / и всем праведным женам / в житии твоем последующи, / явилася еси паче оных преславна, / ибо славою почтенная земною, / на престоле же посажденная, / сердцем и умом не вознеслася еси. / Темже предстоиши ныне пред Престолом Всецаря, / и твоя моления приемлет // Хвальный отцев Бог и Препрославлен.

Издревле праведно пожившим в хождении пред Богом подражающи, / ангелом убо в чистоте и целомудрии, / преподобным же в постех и псалмопении, / и страстотерпцем в претерпении всех зол, / Самому же Вседержителю в милосердии, / явилася еси воистинну достойна счислена быти ликом святых Его, / темже и венча тя во Царствии Своем, / иже на земли тя увенчавый, // Хвальный отцев Бог и Препрославлен.

Богородичен: Блаженная Дево, прибежище скорбящих всех верных, / от всякаго искушения, и печали, и злобы завидящих мне изми, / и от грех и различных недуг избави.

Песнь 8

Ирмос: В пещи отроцы Израилевы, / якоже в горниле добротою благочестия чистее злата блещахуся, глаголюще: / благословите, вся дела Господня, Господа, // пойте и превозносите во вся веки.

Целомудрием яко багряницею одеяна, / и смиренномудрием, яко виссом облечена, / и прочими добродетельми, паче венца царскаго украшена, / благодатию же Божиею, яко росою в пещи искушений орошаема, / лику спасаемых приобщилася еси, / с нимиже ныне поеши: / благословите, вся дела Господня, Господа, // пойте и превозносите Его во веки.

Уста твоя воистинну хранящи, / николиже слово гнило ты рекла еси, / Господеви непрестанно поющи / и к рабом твоим яко ко братии глаголющи, / темже и чтущия тя подвизаеши сердцем и усты воспевати: / благословите, вся дела Господня, Господа, // пойте и превозносите Его во веки.

Плоть твою нещадно изнуряющи / и в молениях яко безплотна пребывающи, / слезами же душу орошающи, / страстей пламень угасила еси, / темже и ныне с лики огнезрачными Небесных Сил / Троицу Всесвятую воспевающи, / не престай молитися о нас, / да избавимся огня вечнующаго / и в прохладнем месте воспоем: / благословите, вся дела Господня, Господа, // пойте и превозносите Его во веки.

Богородичен: Пресвятая Отроковице, апостолов похвало, мучеников славо, / славы  вечныя причастника мя сотвори, взывающа: // благословите Духа Пресвятаго во вся веки.

Песнь 9

Ирмос: Образ чистаго рождества Твоего, / огнепалимая купина показа неопальная; / и ныне на нас напастей / свирепеющую угасити молимся пещь, // да Тя, Богородице, непрестанно величаем.

Одр твой иже бе златом и виссом украшен, / презрела еси, богомудрая, / и на земли смиренно возлегла еси / на костех и рубах острых, / да конечно страсти победиши, / темже тя ныне за Вечерею Христовою / со святыми возлегшую в невечернем дни // любовию величаем.

Естеством жена немощная, / духом же крепчайшая мужей,  / славою и честию царица / и смирением Христова раба, / блаженная Феофание, / в лице Божиих угодник вчинилася еси, / милостыни бо твоя и подвизи твои пред Богом воспомянушася, / и ныне тя, Христом и Церковию Его прославленную, // непрестанно вси сердцем и усты величаем.

Моя скудныя молитвы и хвалы / от устен нечистых тебе приносимыя, / приими блаженная царице, / и якоже в земнем твоем странствовании / ни единаго же любовию своею оставляла еси, / о всех милостивное попечение имущи, / сице и о нас тебе поющих / Христу Богу молися непрестанно / и от бед всех и напастей огради, / да тя яко заступницу святую // вседушно величаем.

Богородичен: Осиянием Твоим мысленным просвети наша помышления, / и сердцá, и разумы, Отроковице Богоблагодатная, / яко да стезями животными праве ходяще, // милость получим, возвещающе присно хвалы Твоя.

Светилен:

Осиянная Духа благодатию, / Богоявленная святая царице Феофание, / озари светом жития твоего потемненная сердца наша, // да радостно Светодавца всяческих с тобою возвеличим.

Слава, и ныне, Богородичен:

Тя песньми немолчными ублажаем, Дево, / яко от Троицы Единаго родила еси, Богородице, / и носиши на Божественных объятиях Божественное Слово, // просвещающаго и освящающаго всех нас.

На хвалитех стихиры, глас 1.

Подобен: Небесных чинов:

Небеных чинов радование / и земных всех удивление, / Богоблаженная царице Феофание, / терпением крайним и смирением мир изумила еси, / нищету Христову и славу Его отмирную возлюбивши, / хвалебныя песни тебе днесь возносим, / радующеся и ликовствующе в памяти твоей, // да предстательством твоим избавление от бед приимем.

К честным мощем твоим припадающе / и лик твой святых лобызающе, / прославляем дивныя подвиги и добродетели твоя, /  и красоту души твоея созерцающе, / веселимся о тебе, Богоявленная царице, // яко ты молишися присно о душах наших.

Песньми похвальными память твою прославляем днесь, / хвалебное славословие возсылающе Христу Богу / нетленным венцем венчавшему тя, / предивная и досточудная мати Феофание, / прилежно молим тя: / проси нам оставления грехов, славящим тя любовию верно.

Доброе земное житие совершила еси, / Богоблаженная царице, / к Богу любовь велию имущи, / упование во искушениих на Господа полагающи, / к молитве во дни и в нощи прилежащи, / чистотою и целомудрием душу украшающи, / ко всем кротость и смирение являющи, / убогим благотворения источающи, / темже в Небесных обителех ныне водворяешися, / присно молящися о чтущих тя.

Слава, глас 8:

Священная рака мощей твоих, / блаженная царице Феофание, / явися яко второе солнце во граде Константина–царя, / сияющи чудесы обильно, / ты  же  всех нас поминай,  почитающих память твою, / и молися Христу Богу / подати одоление православным людем на сотротивныя // и спастися душам нашим.

И ныне, глас тойже:

Владычице, приими молитвы раб Твоих / и избави нас от всякия нужды и печали, / Ты еси, Богородице, оружие наше и стена, / Ты еси Заступница, и к Тебе прибегаем, / Тя и ныне на молитву призываем, / да избавиши нас от врагов наших. / Возвеличим Тя вси, / Всенепорочную Матерь Христа Бога, // Юже осени Дух Пресвятый.

Славословие великое и отпуст. И бывает помазание братии от лампады святыя.

НА ЛИТУРГИИ

Блаженны от канона песнь 3-я и 6-я. Прокимен, глас 7: Честна пред Господем / смерть преподобных Его. Стих: Что воздам Господеви о  всех, яже воздаде ми? Апостол к Галатом, зачало 213. Аллилуиа, глас 4: Праведник, яко финикс, процветет, / яко кедр, иже в Ливане, умножится. Стих: Насажденнии в дому Господни во дворех Бога нашего процветут. Евангелие от Луки, зачало 24.  Причастен: В память вечную будет праведник: